Psa 130 | MMX | STEP | Nenia at kis keneng tubu at lamain bonot at lanbulu silok i vung kimit ia, la a ro ke ram, Leeme Silok.

Psalms 130

Lisingising Ti Doxoma Xepe Laxapmek

1 Nenia at kis keneng tubu at lamain bonot at lanbulu silok i vung kimit ia, la a ro ke ram, Leeme Silok. 2 O Leeme Silok, una ronga lanteng tarak; una ronga res at lisingising tarak la una doxoma xepe laxakapmek tarak! 3 Nege giba sixiroo at loklok asongot taram mo do nenu gitak lok katling leveloklok kakapmek atnema? Kopmen tinotno tara giba sixiro. 4 Ketla u doxoma xepe laxapmek atnema limixin taram, kuren la ma pavanga u mi loklok ngangao.

5 Nia a xulubi aleng ti loklok tooro at Leeme Silok, la a nuunu saga at levelinga ren. 6 A xulubi aleng ti loklok tooro at Leeme Silok, la axo lok ngan luvuttadi xukuxut di xulubi ri labara kooxot; lavavara rak ti xulubi ri Leeme Silok i volo mo lavavara at luvuttadi xukuxut di ngangais ti labara kooxot.

7 Leme Israel, mina nuunu saga at Leeme Silok atla, labalamu ren naba nemen lexen, la neni i vavara amisik i xusu nak lox aroo su limixin basinge leveloklok kakapmek. 8 Neni naba lox aroo su limixin teren me Israel basinge leveloklok kakapmek atnedi.